ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑐᑦ ᐅᑭᐅᖅᑕᖅᑐᒥ−ᓴᓇᔭᐅᔪᓂᒃ ᖃᓄᖅᑑᕈᑎᒃᓴᓂᑦ ᑲᑐᔾᔨᖃᑎᒌᓂᒃᑯᑦ ᓄᓇᖃᖅᑳᖅᓯᒪᔪᓂᒃ ᑲᑐᔾᔨᖃᑎᒌᖑᔪᓂᒃ ᐊᒻᒪ ᐅᑭᐅᖅᑕᖅᑑᑉ ᓄᓇᓕᖏᓐᓂᒃ ᐃᓚᐅᓂᖃᕈᒪᔪᓂᒃ ᐅᑭᐅᖅᑕᖅᑐᒥ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᑦᑑᓂᖏᓐᓂ ᐊᓂᒍᐃᔪᓐᓇᖅᓯᓂᕐᒥᑦ ᐊᒻᒪ ᐊᒥᒐᒃᓯᖏᓐᓂᕐᒥᑦ.

ᐅᑭᐅᖅᑕᖅᑐᒥ ᖃᓄᖅᑑᕈᑎᒃᓴᑦ

ᐱᓕᕆᐊᒃᓴᕗᑦ ᓴᓇᔭᐅᕙᒃᑐᑦ ᓈᓚᖕᓂᒃᑯᑦ, ᐃᓕᓐᓂᐊᕐᓂᒃᑯᑦ ᐊᒻᒪ ᑐᑭᓯᐅᒪᓂᒃᑯᑦ ᐊᔾᔨᐅᙱᑦᑐᓂ ᐊᒃᓱᕉᓴᕈᑕᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐃᓄᐃᑦ ᒪᓕᒐᖅᑎᒍᑦ ᓇᖕᒥᓂᖁᑎᖃᖅᑐᑦ ᐅᑭᐅᖅᑕᖅᑑᑉ ᓄᓇᖓᓂ ᑕᕆᐅᖓᓂᒡᓗ ᒪᓕᒐᕐᔪᐊᖅᑎᒍᑦ ᓴᐳᔾᔭᐅᓯᒪᔪᓂ ᓄᓇᑖᓂᕐᒧᑦ ᐊᖏᕈᑎᓂ ᐅᓪᓗᒥᓯᐅᑎᐅᓪᓗᑎ ᓄᓇᑖᕈᑏᑦ. ᐃᓄᐃᑦ ᖃᐅᔨᒪᓂᖃᑦᑎᐊᖅᑐᑦ ᐊᕙᑎᒥ ᐅᔾᔨᖅᓴᕐᓂᕐᒥᑦ ᐃᒪᕐᒥᐅᑕᓂᑦ ᐱᐅᖅᓱᐊᕐᓂᕐᒧᑦ ᐃᑲᔫᑎᖃᒻᒪᕆᒃᑐᖅ ᓯᕗᓂᒃᓴᑦᑎᐊᕙᓕᐅᕐᓂᕐᒥᑦ.

ᐱᓕᕆᔾᔪᓯᕗᑦ ᐃᓚᖏᑦ ᒪᑯᐊᖑᔪᑦ:

  • ᓄᓇᕗᒻᒥ, ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᓚᐅᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᑕᓪᓗᕈᑎᐅᑉ ᐃᒪᖓ (ᑕᓪᓗᕈᑎᐅᑉ ᐃᒪᖓ) ᐅᓂᒃᑳᓕᐅᕐᓂᕐᒧᑦ ᓇᓗᓇᐃᔭᖅᓯᒪᔪᒥᑦ ᐃᓄᐃᑦ ᓄᓇᒥ ᖃᓄᖅ ᐊᑐᓲᖑᒻᒪᖔᑦ ᐊᒻᒪ ᐃᓄᖃᓲᖑᓐᓂᖓᓄᑦ ᐱᓪᓗᐊᑕᐅᕗᖅ ᐋᖅᑭᒃᓱᐃᓂᕐᒥᑦ ᑲᓇᑕᒥ ᑕᕆᐅᕐᒥ ᐱᐅᖅᓱᐊᓂᕐᒧᑦ ᐃᓂᐅᔪᖅ ᓄᓇᕗᒻᒥ.
  • ᓛᐸᑐᐊᒥ, ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᑲᑐᔾᔨᖃᑎᖃᖅᓯᒪᔪᑦ ᓄᓇᑦᓯᐊᕗᑦ ᒐᕙᒪᖓᓐᓂ ᖃᐅᔨᓴᕐᓂᕐᒧᑦ ᑲᑎᙵᔪᓂᒃ ᐃᒪᑦᑎᐊᕙᖕᒥᑦ ᓇᑦᑎᐅᔪᓂᒃ ᑑᕐᖓᐃᑦ ᐃᓐᓈᕈᐃᑦ ᒥᕐᖑᐃᖅᓯᕐᕕᖓᓂ.
  • ᑕᕆᐅᕐᔪᐊᓕᕆᔨᒃᑯᑦ ᑲᓇᑕᒥ ᐃᑲᔪᖅᓱᖅᓯᒪᔪᑦ ᐊᒃᓱᕈᕐᓂᕆᔭᐅᔪᓂᒃ ᓄᓇᕕᖕᒥ ᓄᓇᓕᐅᔪᒥ ᐊᐅᐸᓗᖕᒥ ᐱᖅᑯᓯᑐᖃᖅᑎᒍᑦ ᖃᐅᔨᒪᓂᐅᔪᑦ ᐊᑐᖅᑕᐅᓪᓗᑎ ᑎᑎᖅᓯᓂᕐᒧᑦ ᐃᒪᕐᒥᐅᑕᓂᑦ ᐆᒪᔪᓂᑦ ᐊᑐᖅᑕᐅᕙᒃᑐᓂ ᐅᖓᕙ ᑲᖏᖅᓱᐊᓂ ᓂᕆᐅᒋᔭᖃᕐᓂᕐᒧᑦ ᐊᒥᓲᓂᖅᓴᓂᒃ ᓴᓇᕕᐊᓗᖕᓂᒃ ᐱᕙᓪᓕᐊᑎᑦᑎᔪᖃᕐᓂᐊᖅᑎᓪᓗᒍ;
  • ᐃᓄᕕᐊᓗᐃᑦ ᐊᖏᖃᑎᒌᒍᑎᑖᕐᓂᕐᒧᑦ ᐊᕕᒃᑐᖅᓯᒪᔪᓄᑦ, ᑕᕆᐅᕐᔪᐊᓕᕆᔨᒃᑯᑦ ᑲᓇᑕᒥ ᐱᓕᕆᖃᑎᖃᓚᐅᖅᑐᑦ ᐃᓄᕕᐊᓗᐃᑦ ᐆᒪᔪᕐᓂᐊᖅᑎᒃᑯᑦ ᑲᑎᒪᔨᖏᓐᓂᒃ ᐊᕐᕌᒍᓄᑦ ᐱᖓᓱᓄᑦ ᐆᒃᑑᑎᒋᔭᐅᑲᐃᓐᓇᓛᖅᑐᒥ ᐱᓕᕆᐊᒃᓴᒥᑦ ᓄᓇᓕᖕᒥ−ᑐᙵᕕᖃᕐᓗᑎ ᖃᐅᔨᓴᐃᓐᓇᖃᑦᑕᕐᓂᕐᒥ.
  • ᑲᓇᑕᓕᒫᒥ, ᑕᕆᐅᕐᔪᐊᓕᕆᔨᒃᑯᑦ ᑲᓇᑕᒥ ᐃᑲᔪᖅᓱᖅᓯᒪᔪᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᓂᓪᓕᐊᔪᑦ ᐱᓕᕆᐊᖓᓐᓂᒃ ᓄᐊᑦᑎᓂᕐᒧᑦ ᐃᓄᐃᑦ ᐃᓱᒪᒋᔭᖏᓐᓂᒃ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓄᑦ.
  • ᓯᓚᕐᔪᐊᓕᒫᒥᑦ, ᑕᕆᐅᕐᔪᐊᓕᕆᔨᒃᑯᑦ ᑲᓇᑕᒥ ᐱᓕᕆᖃᑎᖃᖅᓯᒪᔪᑦ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᐅᔪᓂᒃ ᑲᓇᑕᒥ ᐊᒻᒪ ᑲᓛᖦᓖᑦ ᓄᓈᓐᓂ ᐋᖅᑭᒃᓱᐃᓂᕐᒧᑦ ᐃᓄᖕᓄᑦ−ᐊᐅᓚᑕᐅᔪᒧᑦ ᑲᑎᒪᔨᓂᒃ ᐊᑐᓕᖁᔭᐅᔪᓂᒃ ᖃᓄᖅ ᐱᐅᓂᖅᐹᒃᑯᑦ ᓴᐳᔾᔨᔪᓐᓇᕐᒪᖔᑦ ᐱᑭᐊᓚᐅᕐᓱᐊᕐᒥᑦ, ᐅᕝᕙᓘᓐᓃᑦ ᐅᐊᓐᓇᖓᓂ ᐃᒪᕐᒥ ᓴᕐᕙᖅ.